ՀՀ Առողջապահության նախարարությունը պետական բյուջեից մի քանի խոշոր գումար է փոխանցել «Արֆարմացիա» ընկերությանը, որի 31 տոկոս բաժնեմասը պատկանում է առողջապահության նախարար Անահիտ Ավանեսյանի մորը՝ Մարգուշ Վարդանյանին։ Այս փաստը բացահայտել են պետական գնումների համակարգում կատարված վերլուծությունները։
«Արֆարմացիա» ընկերությունը, որը տարիներ շարունակ զբաղվում է դեղերի և բժշկական նյութերի մատակարարմամբ, 2025 թվականին ստացել է առողջապահության նախարարության կողմից մի քանի խոշոր վճարումներ։ Ըստ պաշտոնական տվյալների՝ 2025 թվականի ընթացքում կատարվել են հետևյալ գործարքները․
Հունվարի 20-ին՝ շուրջ 14 մլն դրամ,
Հուլիսի 20-ին՝ շուրջ 30.6 մլն դրամ,
Հոկտեմբերի 9-ին՝ շուրջ 38.5 մլն դրամ։
Այս գործարքների ընդհանուր արժեքը կազմում է ավելի քան 80 միլիոն դրամ։
Գնումների փաստաթղթերից պարզ է դարձել, որ խոսքը վերաբերում է առողջապահական լաբորատոր նյութերի և դեղերի մատակարարմանը, որոնցից մեկը մեթադոնն է՝ թմրանյութ պարունակող դեղամիջոց, որը կիրառվում է բժշկական հատուկ ծրագրերում։
Այսպիսով, պետական գնումների պատվիրատուն հենց այն կառույցն է, որը ղեկավարում է Անահիտ Ավանեսյանը, ինչը բարձրացնում է շահերի հնարավոր բախման վերաբերյալ հարցերը։ Թեև պետական գնումների համակարգը նախատեսում է մրցութային ընթացակարգեր, նման գործարքները հաճախ ենթարկվում են քննադատության, երբ պետական գերատեսչությունը գնումներ է կատարում ընկերությունից, որի բաժնետերերից մեկը բարձրաստիճան պաշտոնյայի ընտանիքի անդամ է։
